الاثنين، 26 يوليو 2010

هل سوف نحاسب يوم القيامه علي ايدلوجياتنا ؟؟؟

انا عمري ما سمعت عن حاجه اسمها ايدلوجيه خالص في حياتي قبل لما ادخل مجال السياسيه ولا قريتها في جرنال ولا سمعتها في اي حتي ولا قريتها في القران وكانت بالنسبه ليا حاجه جديده وكلمه جديده ...

ليبراليه – علمانيه –شيوعيه – قومي – اسلامي ..

طبعا فيه فرق كبير بين كل حاجه والتانيه وبتوصل ان صاحب ايدلوجيه من دول مي بيحب التاني علشان عااكسه تفتكروا كل ده وليه كل الايدلوجيات ده اللي هي من اختراع الانسان اللي هو زي زيك يعني اكيد فيه غلطات عنده لانه انسان يعني عمرنا ما سمعنا عن رسول ليبرالي او عن نبي شيوعي ليه سيبنا القضيه المهمه وبقينا بنفكر اكتر من ايدلوجيتنا ليه سبنا انتمائاتنا الاساسيه وسيبنا دينا مهما كان هو ايه وبنفكر في كل ده علي ما اعقتد ان مفيش حاجه اسمها ايدلوجيه في الانجيل ولا حتي التوراء ولا حتي لقران ...

ليه احنا سبنا دينا وبقينا بنغير علي الايدلوجيه بتعاتنا اكتر مننا بنغير علي دينا من الاهانه ومن اللي بيحصلنا واللي بيحصل لرسولنا الدين اللي هو من عند ربنا جي من فوق بقي هين عندنا اوووووي والايدلوجيه اللي هي من اختراع الانسان بقيت حاجه كبيره اوووي ..

انا مش ضد الايدلوجيات لكن بحمد ربنا اني مش بنتمي لاي ايدلوجيه علشان انا شيفها انها لا تلقي بيا لو بسيت علي الدين وعلي القران بتاعنا فيه كل الايدلوجيات ده بتقوله بس بشكل احسن واوضح وبشكل هيوصلنا للاحنا عاوزينه لكن للاسف احنا بنعد عن ده وبندور علي حاجه تانيه وبندور علي اللي يبعدنا عن الدين ويكون فيه اللي احنا عاوزينه وبمزاجنا ...

راي ان الايدلوجيه ده من اختراع الانسان ومهمتها الاولي هي ابعدنا عن الدين وتفكريبنا في الدنيا واننا نسي حاجه اسمها ربنا وحاجه اسمها دين مهما كان الدين ((اسلام – مسيحيه )) كل ايدلوجيه فيها حاجه عكس الدين او فيها حاجه تبعدنا عن الدين وده اللي انا لحظته في اكتر من ايدلوجيه ان كانت اليبراليه او الشيوعيه او حتي العلمانيه واكيد في حاجات تاني بس انا مش عارفه ...

انا مش ضد الايدلوجيه او بهجمها لكن لازم نهتم بحاجه اسمها دين والدين يتهان من حولينا وربنا الناس بتتكلم عليه وبقي الناس فخوره جدا بالحادها واهنتها لله وبقيت موضه دلوقتي اي حد يشتم ويهين واحنا نمين في العسل مش فاضين علشان الليبرالي قاعد بيظر مع الشيوعي والشيوعي مش عجبه كلام الاسلامي ....

فخور انني ملحد الايدلوجيه ...
فخور اكثر اني مسلم موحد بالله ...

السبت، 17 يوليو 2010

هل فقدت المؤسسه العسكريه هيبتها ؟؟؟

كلنا عارفين ان المؤسسه خط احمر لا يمكن اننا نقرب منه علشان اللي بيقرب منه بيروح ورا الشمس وكل عارفين اللي بيحصل للي بيكتب عن المؤسسه العسكريه ..
لكن انا بقي فاض بيا من اللي بشوفه في البلد ده ومن اكبر مؤسسه موجود ومن المفروض انها اقوي مؤسسه كمان في البلد ده ...
العسكريه المصريه اين هي الان تعالي نقارنها شويه بزمان ونرجع بالزمن شويه لكام سنه ورا كده مش كتير اوووي المؤسسه والجيش المصري مهمته الاولي في هي حمايه البلد وتامينها من الخطر الخارجي عليها وكانت تتدخل في حل الازمات الصعبه داخل البلد كانت لها هيبتها ومكان لها مكانها في العالم ومركزها الرفيع امام المؤسسات العسكريه الاخري بدول العالم ..
اين هي الان ؟؟
هي اللي بتعمل العيش وهي اللي بتوزع الانبيب وكمان هي اللي بتعملنا الطرق ووكمان اللي اللي بتعمل الشواطئ وكمان الجزر اللي في النيل ....
المؤسسه العسكريه تحولت من مركز قوه وحمايه لهذه البلد تحول الي شركه مقاولات ..
بدل ان يعلم جنوده ما هي معاني الدفاع عن الارض والوطن يعمله كيف يخبز العيش وبدلا من وضعه علي الجبهه للدفاع عن مصر الان واقف في كشك عيش او بيوزع انبيب بدلا من وقفه علي احد الجبال لحمايه الحدود الان يعمل كعامل بناء بيرصفوا الطرق وبيعملوا الكباري والاستدات ....
فين هيبه المؤسسه العسكريه هيبه المؤسسه العسكريه راحت في ظل النظام الحاكم الموجود لازم المؤسسه العسكريه ترجع هيبتها ولازم يرجع الجيش اللي حارب اسرائبل وهزمها ومن قبلها قعد يناضل من اجل البلد ده من واجل بلاد تاني ...

هو انا ليه بحب مصر ؟؟


سالت نفسي السؤال ده لقيت جابات كتير اووووي توهت في حاجات كتير معقول السؤال ده صعب ااوي كده مش عارف بظبط لكن لازم القي اجابه مقنعه ولازم انت كمان تلاقي اجابه مقنعه لنفسك مهما كانت هي الاجاه بس لازم تكون مقنع بيها ...
بتحب مصر ليه ؟؟
علشان لقيت نفسك اتولدت فيها ...
علشان هي بلدك ولازم تحبها ..
ولا علشان هي اعظم واحلي بلد في الدنيا ..
بتحبها علشاان نيلها ولا علشان تربها ولا علشان ناسها ولا علشان ايه بظبط ..
بتحبها علي شهدائها ولا علشان شعبها الحنين الطيب ...
بتحبها ليه بظبط ..
اجابات كتير اوووي دماغي تاهت توهت في جمالها وجمال شعبها ونيلها توهت ..
مش واجب عليا اني ابحبها لكن فرض عليا مصر اعظم بلد في الدنيا شعبهاالطيب مصر اللي ربنا عظم ارضها وتربها وشهدائها ورجالها مصر اللي ذكرت في القران مصر اللي مات فيها ملايين الشهداء علي مر التاريخ علشان يحافظوا علي الارض ناس فضتها بدمها علشان يحافظوا عليها يبقي بقي محبهاش ....
مصر محتاج لكل ذره حب جويا محتاجه مني اني اتحرك واثبتلها اني بحبها طول عمرنا عارفيين ان الحب مش مجرد كلمه بنقولها وبس الحب افعال وحاجات كتير .
شوف انت بتحب مصرليه احسبها صح وانت هتقدر تعملها كل حاجه فكر بعقلك وقلبك وبكل حاجه جواك واسال نفسك ..هي البلد محتاجه اني اضحي علشانها ؟؟
انا سالت نفسي وعرفت واخترت اني هضحي بكل حاجه علشانها وعلشان اهلها الطيبين اسال نفسك بسرعه قبل لما تندم انك مش عملت اي حاجه للبلد ده ..
انا بقي عرفت انا بحب مصر ليه ....انت عرفت ؟؟؟

الجمعة، 16 يوليو 2010

طالب كليه شرطه برتبه لواء


بلاحظ كتير ان طلبه كليه الشرطه عايشين في الدور جامد جدا علي اساس انهم لوائات في الشرطه ((ده لو كان اساسا اللوائات دون محترمين يعني ))
الواد منهم يدخل كليه الشرطه ولسه عنده 17 او 18 سنه وبياخد المصروف من اهله وتلاقيهه بيتصرف تصرفات غريبه جدا عايش علي صاحبه الدور وبيتكلم معاهم بكبرياء وبيتعامل مع اهله علي اساسا انه اللي محدش زيه ولازم الناس كله تحترمه مع انه لسه عيل صغير بشخه والا بقي التعامله مع الناس في الشارع يااه بتكون معامله زباله اوووي وماشي علي اساسا انه لواء شطره او وزير الداخليه ..
ولو معاه عريبه بقي علشان يروح يعمل الرخصه يتنك علي العساكر والامناء اللي هناكومش عاوز يختبر اخبارات القياده ظابط بقي هتيزل يسوق ويمتحن زيه زي اي احد ليه يعني ولو دخل علي كمين ومش معاه رخصه يعدي علي طول ومحدش يكلمه وكمان تلاقي العربيه بتاعته مخالفه فاميه بقي ولازم يحط النصر علي الازارز من ورا وكمان شويه كلام بقي علشان الناس تعرف انه ظابط شرطه لو انسان بقي محترم عادي جدا ياخد مخالفه وغير الشتيمه اللي بيخدها ببلاش فوق البيعه ..

حاجه مستفزه جدا يكون لسه طالب وتحس انه لوء ليه هبته ومركزه ..
وتسال بيعمل كده ليه متلقيش غير رد واحد ...
يا فرعون ايه فرعنك ملقتش حد يلمني ..
فساد جهاز الشرطه والداخليه يكون السبب الرئيسي في المصيبه ده اللي بيعمل كده في الطلبه انهم اله علي الارض ((ولله الملك واحده )) محدش يقدر يجي جنبهم ليــه متعرفش في ايه متعرفش كلنا بشر الفرقفي كل ده الاحلام والامكانيات الماديه علشان طبعا كلنا عارفين دخول كليه الشرطه بالفلوس والوسطه وبيكونوا هما السبب الرئيسي يعني اي معفن لو معاه قشين يدخلوا كليه الشرطه ويدوس بقي علي الناس وهو اساسا لسه معفن بشخه ...
**في اخر الكلام عاو اقول ان هيجي اليوم اللي هينضف جهاز الشرطه من القله المنحرفه اللي جواه القله البايظه وهتكون في شفافيه ونزاهه في اختيار اللي قد المسئوليه وقد كليه الشرطه ...
وبطالب بمحكامه كل من :
1- الوزير حبيب العادلي وزير الداخليه
2- اسماعيل الشاعر مدير امن القاهره
3- كل افراد وطاقم العمل داخل كليه الشرطه
4- محاكمه جميع المسئولين عن اختيارات الطلبه
5- محاكمه الطلبه نفسهم

من اقوال السادات ...



بقلم بسمه فؤاد


لا يحتاج شعبنا إلى توعية أو تعبئة، لأن شعبنا هو أبو التاريخ ومحرك التاريخ وصانع التاريخ.لا يمكن أن يكون هناك استقلال مع احتلال أراضينا، ولا يمكن أن يكون هناك إرادة مع التخلف.

أن البناء لم يشغلنا عن المعركة، ولا المعركة شغلتنا عن البناء، وفى الحقيقة فإن المعركة هى من أجل البناء، كما أن البناء هو من أجل المعركة.

أن أعلام الحرية لن تسقط على هذه الأرض العظيمة الطاهرة أبدا..أن أعلام الحضارة لن تتراجع..... أن أعلام التقدم لن تتوقف..... .. أقوى وأقوى بإذن الله، وأعلى وأعلى بإذن الله. أن التجربة العملية تقول أنه لا يستطيع أى قائد أو قيادة أن تقرر وتكون على ثقة من القرار مهما كانت الخطورة فيه إلا على اشتراط واحد وهو اليقين من إرادة الشعب.

هذا الشعب المصرى لم يعرف فى تاريخه النضال بالكلمات ولا مارسه فى يوم من الأيام، ، والدليل على ذلك ما قدمه هذا الشعب من عطاء حقيقى للمعركة وما سوف يقدمه من عطاء حقيقى للمعركة. أمانة المسلك هى أمانة الهدف .. ومسئولية الفكرة هى مسئولية العمل. وأى فصل بين الاثنين نوع من انفصام الشخصية.. لا يليق ولا يجوز، بل ولا هو يجدى.

إن الديمقراطية هي صوت وحركة الجماهير.. وبلا وصاية.

إن الاشتراكية هى طريق قوى الشعب العاملة، لم تعد تحتاج إلى من يسوقها عليه بالقسر.

أن الدولة أداة خدمة للمصلحة العامة، وليست سلطة عليها فوقها.


إن الإنسان هو الوطنتبدأ الديمقراطية عنده.. وتكون الاشتراكية لمصلحته، وتعمل الدولة لخدمته، ويصدر القرار للارتقاء بحياته يوما بعد يوم

.بالثقة فى الله سبحانه وتعالى وبالثقة فى النفس. بالثقة فى الصديق. بالثقة فى القريب. بالثقة فى الحق. بالثقة فى العدل. سوف نمضى. وسوف يكون الله سبحانه وتعالى هاديا لمسيرتنا وراعيا لها. بالثقة فى الله سبحانه وتعالى وبالثقة فى النفس. بالثقة فى الصديق. بالثقة فى القريب. بالثقة فى الحق. بالثقة فى العدل. سوف نمضى. وسوف يكون الله سبحانه وتعالى هاديا لمسيرتنا وراعيا لها.

نحن قوة من قوى السلام فى العالم.. والسلام نضال فى سبيل الحرية.. والسلام نضال ضد الاستعمار.. والسلام إيمان بحق تقرير المصير.. والسلام إحساس بالآمال المشتركة للشعوب

إن حرية الفكر حركة داخل الإنسان ولكن إذا خرجت الفكرة إلى العالم الخارجى،وتجاوزت مرحلة الاعتقاد إلى مرحلة إشراك الآخرين فيها كان عليها أن تلتزم الصدق والموضوعية ومبادئ المجتمع وقيمه.

التعاون من أجل الفهم والسلام يد مبسوطة بالمعرفة والحب الكبير الذى لا يعرف الكراهية والحقد ويتطلع إلى إخاء عالمى يربط الأرض بالسماء، والإنسان والعبادة بالسماحة، والكلمة الطيبة بالعمل الطيب، والشعوب المتقدمة بالشعوب النامية ومناطق الوفرة بمناطق الحاجة. لقد أثبت 6 أكتوبر للعالم مدى صلابة إرادتنا الوطنية وحرصنا على استقلال هذه الإرادة مهما كان الثمن.وأثبت أن خلود هذا الشعب ليس خلود الموتى ولكنه خلود الأحياء، القادرين على أن يجددوا أنفسهم على مر الزمان.

أن أقوى الأسلحة التى امتلكها الإنسان وسوف يظل لها دائما فاعليتها الحاسمة هى روح الصمود.

لقد آمنت وسوف أظل أؤمن أن كبريائي هو حقوق وطني وحقوق أمتي.

لم يتقاعد هذا الشعب أبدا فى تاريخه عن أمل ولا هرب من تحد ولا غابت منه عزائم الرجال تصنع تاريخا وتقتحم مستقبلا.

نحن اليوم نحتاج إلى الأصالة والى الفكر والعالم والعمل لكي نأخذ الأمل بأيدينا، ولكي نصنع به مستقبلنا ونساهم به في صنع مستقبل أمتنا العربية كلها ونحقق ونؤكد دورا عربيا لا غنى عنه ولا بديل عنه في تشكيل عالم جديد يقوم على الحق وينشد السلام العادل. ليست الآثار الباقية على أرض صعيد مصر مجرد أحجار صماء. ولكنها شواهد فكر خارق.. وشواهد عمل متقدم.. وشواهد علم دقيق.. كل ذلك يتوجه إيمان عميق بالدين وبالخلود.

اضربوا الحقد يا شعبنا لأنه أعدى أعدائنا اليوم ولا يتولد الحقد إلا فى النفوس المريضة الضعيفة.


أدعو أن يساعدنى الله سبحانه وتعالى على أن أقول دائما كلمة الحق فى وجه الأقوياء. وأن يساعدنى على ألا أقول الباطل لأكسب تصفيق الضعفاء


.أن مصر لتقدر النضال فى سبيل الحرية والاستقلال، وتعرف أقدار المناضلين والأحرار، لأنها طالما كافحت على امتداد التاريخ لاسترداد حريتها وصيانة عزتها.أن معدن مصر من معدن فلاحها المصرى.. معدننا لا يصدأ لأن أبعاده الحضارية تحميه دائما من الصدأ والتلف


أن اشتراكيتنا اشتراكية تمليك لا تجريد وأننا نطورها حسب واقعنا الخاص بنا وتراثنا الذى يميزنا


.وطننا من قديم هو وطن السماحة والإخاء وفى أبنائه هذا الحس العميق الذى يستطيعون به أن يميزوا بدقة بين جوهر الدين فى صفائه وبين التعصب فى جموحه وخطرة مهما تستر برداء الدين إسلاميا كان أو مسيحيا.

الأربعاء، 14 يوليو 2010

نعم الالتراس الاهلاوي فوق الحكومه والفرعون مبارك واكلابه ..





تعتبر نفسي عاشق للفانله الحمرا عاشق للنادي الاهلي وجمهور الاهلي ومعترف ايضا متعصب جدا للنادي ولجماهير النادي وعاشق للالتراس الاهلاوي لانهم هما فعلا عمود النادي ناس بضحي بكل حاجه علشان خاطر هدف معين مهما كنت مختلف معاهم في التضحيه ده او معاهم في اللي هما بيعملوه بس هما ورا النادي في كل مكان بيروحه …

جمهور الالتراس متعصب جدا للنادي الاهلي وبيعتبر ان النادي الاهلي كاسم فوق اي حاجه حتي لو كان الامن والحكومه المصريه كل فتره بتزيد ازمه بين الجماهير وبين الامن المصري كل فتره اشتباكات بينهم واعتدائات من قبل الامن في جماهير الالتراس ومش عارف ايه السبب الناس ده ولا ليها في السياسيه ولا ليها في اي حاجه غير انهم يشجعوا فرقتهم بجنون وبس لكن ازاي بقي الداخليه تشوف حد فرحان وتسكت ازاي يعني ما هي الداخليه ده موجود علشان تنكد علي اللي جبونا مش عارف يعني الكوره بضرهم في ايه بظبط مش عارف تشجيعي لفريقي بيحرقهم كدا ليهم ....

امبارح اتفاجت باللي عمله الامن مع جماهير الالتراس واتفاجت وفرحت جدا باللي عمله الالتراس مع الامن علشان فعلا لازم الامن يقف عند حده مع التعامل مع الجماهير ويعرفوا انهم مش ضعفاء والدليل امبارح اهو مش اقل من 8 اصابات ي صفوف الامن وده عمرها ما حصلت في المظاهرات في الفتره الاخيره كان اخرهم اصابه واحده وبالغلط كمان السعاده بامبارح كانت ماليه قلبي وانا بتفرج علي الصور اللي اترفعت علي النت ونزلت علي المواقع الاخباريه انا مش بحرض علي العنف وانا ضد العنف لكن لما العمليه تبقي كده يبقي لازم يبقي فيه واقفه في الموضوع ده انا بحي الالتراس علي اللي عملوه امبارح مع كلام الداخليه ومع كلاب مبارك ..


بس انا كان عندي تسال غريب وصغنون ...

هو اليه الامن بيصعد كده ضد الشباب وضد الشعب ؟؟؟

طيب احنا كا سياسيين بيستخدم العنف علشان احنا بنطالب باسقاط الحكم ومشكلتنا معاه ((رغم ده مش مبرر )) لكن جماهير الاهلي ليه بيستخدم معاهم جدا وعلي فكره مش جمهور الاهلي بس هو بيستخدم كده مع جمهور الالتراس لكل الانديه ..
سؤال منتظر اي كلب من كلاب الفرعون انه برد عليه ان كان عمو اسماعيل باشا الشاعر او حبيب العادلي اللي اسمه مش علي مسمي خاااااااالص ...
الي جماهير الالتراس الاهلاوي ...
اكملوا ما بداتم بيه عام 2007 انتوا اللاعب الاول بالنادي الاهلي انتم سند الفريق عليكم ان تساندوا فريقكم وان لا تنظرووا لما يفعله الامن بكم وردوا كما فعلتم به بمباره الاهلي وكفر الشيخ ...
ولكم كل تحياتي وعشقي لكم ولنادينا العظيم
وسيظل الاهلي فوق الجميع فوق الحكومه والنظام وفوق الفرعون مبارك وكلابه






الثلاثاء، 13 يوليو 2010

واخير فجر مصر طلع ...


الف مبروك خروج فجر مصر مسعد ابو الفجر بجد انا مبسوط جدا بالخبر ده من فتره كبيره اوووي مفرحتش كده نسيت كل همومي وكل المشاكل اول لما قريت الخبر وكمان فرحت اكتر بعد لما كلمت حرمه لكن للاسف مش عرفت اكلم مسعد نفسه علشان مشغول عنده ناس كتير غير المكالمات اللي بتجيله كل شويه مصر كلها فرحانه انهادره علشان فجر مصر بقي حر الحمد لله علي خروج مسعد ومتنظرين منه ان يكمل الطريق اللي بداوا واحنا وراه كلنا ...

لماذا قتل السادات ؟؟؟ الحلقه الاولي


السؤال ده بقاله كتير جدا نفسي اعرف اجابته لحد لما قريت كتاب فيه كل الحقائق ورا قتل السادات ...

هؤلاء من قتلوا السادات ((انيس الدغيدي ))
ممكن تقولوا ان الراجل ده مش كاتب ومش بيعرف يكتب اساسا بس الراجل صرح اساله ومحدش جاوب عليها ..
السوال دلوقتي السادات اتقتل ليه ومين اللي ورا قتله ؟؟؟
الناس كلها عارفه ان السادات اللي قتله الاسلامبولي والناس اللي معاه علشان قيام الدوله الاسلاميه واعلان الثوره الاسلاميه زي ما حصل في ايران طي انا مع الكلام ده طيب ليه متقتلش برضو مبارك وابو غزاله وهما الاتنين كان قاعدين جنب السادات في المنصه وعل يحسب اعتراف القتله وكمان اعترفهم ان الاسلامبولي قالهم ابعدوا انتوا احنا عاوزين الفرعون طيب ازاي عاوزين الفرعون علشان يقتلوه مقتلوش النائب بتاعه وكمان مقتلوش وزير الدخليه علشان تقوم فعلا الثوره الاسلاميه زي ما هما عاوزين علشان يكون الجو فاضي ومتاح ان الثوره تقوم فعلا ...
يبقي هنا السوال ..لماذا لم يقتل مبارك واللواء ابو غزاله ولماذ تركهم القتله علي قيد الحياه ؟؟؟

من الاخر علشان منرغيش كتير مبارك وابو غزاله هما اللي ورا قتل السادات وطبعا بمساعده رجال كتير من رجال الدوله وده المعروف بدليل ان الباشا مبارك كرم كل اللي كانوا في المنصه ورقاهم واللي بقي وزير واللي بقي محافظ واللي بقي لواء يعني من الاخر كده هو اللي ورا قتل السادات ..

فيه مثلا بيقول ((اذا اكرمت الئيم تمرد ))
المثل ده فعلا بينطبق علي مبارك وكلابه اللي موجودين واللي ماتوا واللي كانوا ورا قتل السادات ..
دلوقتي فيه ادله كتير واساله كتير تدل علي ان الكلب اللي اسمه مبارك هو اللي ورا قتل السادات .
ليه بقي ميتمش فتح تحقيق في مقتل السادات ويتم معاقبه الفاعل اذا كان علي قيد الحياه طبعا فيه منهم كتير علي قيد الحياه وهو راس الافعه لسه عايش ومبرطع في خير السادات وعمال يسرق فيها ويقتل اهلها ..

صحيح يعني احنا زعلنين علي اللي بيحصلنا ليه ما اللي يخون ولي نعمته ممكن يعمل اي حاجه مبارك ده كان ايه اساسا قبل السادات مين اللي عمله يعني ايه سياسه يعني ايه حرب هو اللي عمله كل حاجه مبارك كان منوفي معفن السادات جابه نضفه وعينه عنده لحد لما بقي نائب ليه ((علي فكره السادات كان محضر ورقه فيها اعفاء مبارك من منصب النائب )) ...
انا نفسي الملف ده يتفتح تاني والاسئله اللي موجوده مبارك يجاوب عليها ..

تفتكروا ممكن مبارك يقف ادام القضاء للدافاع عن نفسه ؟؟؟
اسئله كتير جدا لو مبارك جاوب عنها بكل صراحه مكانه الوحيد هيكون عشماوي ..
ده اول حلقه في موضوع قتل السادات المره اللي جيه هنشر كل الاسئله اللي مرتبطه بقضه المنصه قضيه الخيانه العظمي ...

عادي جدا ...


عادي جدا اول لما تصحي من النوم وتنزل الشارع اول حاجه تشوفها جبل زباله ..

عادي جدا اول كلام تسمعه شتيمه وسب دين ...

عادي جدا وانت ماشي تلاقي ماصوره ميه مكسوره ومغرقه الدنيا ...

عادي جدا تروح الشغل في ساعه واساسا لو روحت ماشي هتروح في تلت ساعه ..

عادي جدا علشان تروح وسط البلد تلاقي الدنيا كلها زحمه وتاخد ساعه ونص في الطريق ولو فكرت تاخد مترو تموت من الزحمه والحر ...

عادي جدا لم اتحب تنزل مظاهره تاخد علقه سخنه وتتشتم ..

عادي جدا كل يوم تلاقي الاسعار بتزيد ومش عارف تجيب فلوس من فين ...

عادي جدا تلاقي كل شويه البايعين اللي في الشارع بتجري من البلديه ...

عادي جدا تلاقي امناء الشرطه بترخم علي الناس وتاخد منهم فلوس ...

عادي جدا ان تروح بليل وتلاقي كمين يفتشك ويبهدلك ...

عادي جدا تقري خبر الجرنال عن انجازات الحزب الوطني اللي نفسي اشوفلهم اي انجاز..يمكن انا اللي مش بشوف؟؟؟طيب الشعب كله مش بيشوف ...

عادي جدا انك تلاقي معارضه وحزب معارض بيشكر في مبارك وانجازته ...

عادي جدا تلاقي مفتي الجمهوريه بيقول فتوي ملهاش اي لازمه اساسا انها تتقال حتي لو صح ...

عادي جدا تلاقي التلفزيون قرفك بحاجات هبله جدا ..

عادي جدا انك تلاقي عيال صغيره نايمه في الشارع علي الرصيف...

عادي جدا تلاقي ست كبيره بتلم اكل من جبل الزباله علشان تاكل ولادها ...

عادي جدا البلاوي ده كلها تلاقيها طول ما انت ماشي في مصر ..

مش عارف الواحد ممكن يعيش ازاي من غير الحاجات ده الواحد اتعود عليها خلاص ممكن الواحد يموت لو محصلش كل ده في يومه الحكومه بتعاتنا مظبطنا علي الاخر بتعمل كل حاجه علشان تخلينا نبعد عن الساسيه واللي يفكر فيها بيحصل انه بيضرب والله الواحد مش عارف يقولهم ايه ؟؟؟


تفتكروا بقي ممكن اصحي من النوم ميكنش فيه العادي جدا ده ؟؟؟